Cuentus n'asturianu

El tsobu viechu

Tsariega

Una vez andaba pur aiquí un tsobu viechu miu afamiáu. Andaba solo purque la tsoba que faía parexa cun él murriera d’una fartura. Baxaba del Cumún ya fatióu que pur aitsí andaba dalgún curdeiru u cabritu. Espacín foi yendo pal tsáu de onde vinía aquetsa ulea ya alcuntróu a dous carneiros que pacían nel Uteiruelu. Abríu aquetsa bocaza negra que tienin lus tsobus ya dixu, autsandu comu’n Rinubieru:

- ¡Voi a cumé-vus!

Lus carneirus quedanun muitu espantáus, pero unu d’etsus dixu muitu triste:

- Amira, tsubín, nos somus hermanus ya nun tenemus más que este campín. Antias de murrer queremus partí-lu. Después comes-nus ya alín. Peru amira, queremus dexálu bien deferenciau, asina que tenías que ayudá-nus. Ponte tú nu mediu ya nus midimus.

El tolu’l tsobu púxu-se un mediu ya lus carneirus puxénunse nus tsendones del campu. Ya arremetienun después lus dous contra’l tsobu ya turriánun-lu a la vez ya dexánun-lu aitsí esflanquecidu. Ya después pechanun caminu abaxo ya fonun berrandu pa la sua corte.

El probe tsobu tsevantóu-se cumu pudu ya marchóu pa la braña la Degutsada. Achegóu de nueite. Al tsau de las cabanas atupóu un burricachu ya díxu-tse lu mesmu, que tinía muita fame ya que nun tse quedaba más remediu que cumé-lu.

El burru díxu-tse que buenu, que también yera viechu ya que taba chenu mataduras, que yera muitu mechor murrer que xubir ya baxar cargáu cunus odres del tseite ya la sua ama que yera grandona ya gorda que cuasi nun pudía cun etsa. Si teraba p’alantre yera purque lu aguichaba ya nun tinía más remediu que andare. Ya acabóu diciendu:

- Ansina que cóme-me de una vez. Peru amira, nesta pata espetéi un escambrón ya duel-me muitu. Cun esus dientinus tan guapus que tienes habías de sacáme-lu pa después espanzáme al tou gustu ya manera

Amirai si yera tolu el tsobu que nun se tse ocurríu outra cousa que poné-se a sacá-tse l‘escambrón. Peru cuandu abríu la boca, el burru, que tinía la pata tsevantada, pegóu-tse nus dientes, mueles ya culmietsus ya nun tse dexóu nengunu naquetsa boca que tinía.

Sien dientes, culmietsus nin muelas ya nun pudu comere más anemales ya murríu de fame.

Jotaele

Valid XHTML 1.1 ¡CSS Válido!

Diseño: David de Marión